Руминияда такрорий президентлик сайлови бошланди
Мамлакат фуқаролари можароли ўтган ва натижалари бекор қилинган олдинги сайловдан сўнг президентни қайтадан сайламоқда.
Руминияда рўйхатга олинган сайловчилар сони қарийб 18 миллион киши бўлиб, улар 19 мингга яқин сайлов участкасида овоз беришлари мумкин. Чет элда яшовчи руминлар учун овоз бериш кеча бошланган ва уч кун давом этади.
Президентликка ўн бир нафар номзод даъвогарлик қилмоқда. Агар 4 май куни улардан ҳеч бири 50 фоиздан ортиқ овоз тўплай олмаса, 18 май куни сайловнинг иккинчи тури ўтказилади.
Дастлабки сўровнома натижаларига кўра, иккинчи турга чиқиш имкониятига эга бўлган номзодлар — Молдовани давлат сифатида тан олмайдиган ултрамиллатчи Жорже Симион, Бухарест мэри Никушор Дан, ҳукмрон коалициядан номзод Крин Антонеску ва 2024 йилда Конституцион суд томонидан бекор қилинган сайловда иккинчи ўринни эгаллаган Европа йўналишидаги сиёсатчи Елена Ласкони.
2024 йил ноябр ойида бўлиб ўтган президентлик сайловларининг биринчи турида кутилмаганда 62 ёшли ултра ўнг сиёсатчи Кэлин Жоржеску етакчилик қилган эди. Биринчи турга икки ҳафта қолганида ТikTok ижтимоий тармоғида унинг фойдасига кенг кўламли кампания бошланган.
Руминия разведка хизмати маълумотларига кўра, бу кампанияда тахминан 25 мингта аккаунт қатнашган. Разведка хабарига кўра, ижтимоий тармоқларда ултра ўнг ва россияпараст номзодни оммалаштириш бўйича кампанияни Россия уюштирган. Руминия махсус хизматлари Россияни сайловларга аралашишда айблаган ва Бош прокуратура натижаларни сохталаштириш бўйича жиноят иши қўзғатган. Бундан ташқари, Руминия Марказий сайлов комиссияси молиялаштириш манбалари ноаниқ бўлгани учун Жоржскуга қайта сайловларда қатнашишни тақиқлаган.
