Сиэтлдаги Вашингтон университетида Фаластинни қўллаб-қувватловчи 25 нафар намойишчи ҳибсга олинди
«Вашингтон университетида полиция камида 25 кишини ҳибсга олди. Улар университетнинг бир биносини эгаллаб олиб, олийгоҳ раҳбариятидан Boeing компанияси билан алоқаларни узишни талаб қилишди. Бу талаб Ғазо секторидаги уруш учун қурол етказиб бериш билан боғлиқ эди», дея хабар бермоқда телеканал.
«Университетнинг биноларидан бири Students United for Palestine Equality and Return номли гуруҳ томонида эгаллаган. Гуруҳ вакили ABC News’га бинода бўлганларнинг барчаси ҳибсга олинганини билдирди.
Вашингтон университети вакили Виктор Балтанинг сўзларига кўра, фаоллар бинонинг ёпилишидан бироз олдин уни эгаллаб олган. Балта улар ўз юзларини ниқоб билан ёпганини, бинога кириш-чиқиш йўлларини тўсиб қўйганини ҳамда ташқарида иккита ахлат контейнерини ёқиб юборганини айтди.
CNN маълумотига кўра, ушбу бинонинг қурилиши қисман Boeing томонидан берилган 10 миллион долларлик хайрия ҳисобидан молиялаштирилган. 2022 йилдаги матбуот баёнотида Боеинг билан Вашингтон университети ўртасидаги ҳамкорлик юз йилдан ортиқ тарихга эга экани таъкидланган эди.
ABC News’нинг хабар беришича, намойишчилар бинога бошқа ном берилишини ва университет Боеинг билан барча алоқаларни узишини талаб қилишган. Уларнинг фикрича, Вашингтон университети Boeing билан мустаҳкам ҳамкорлик орқали Фаластин халқига нисбатан геноциднинг бевосита ҳамкорига айланган.
