12 майдан Украинада ўт очишни тўхтатиш таклифи ҳақида ўйлаб кўришимиз керак — Россия президенти матбуот котиби
«Бу ҳақда ўйлаб кўришимиз керак. Бизнинг ўз позициямиз бор. Биз мулоқотга ҳамда Украинадаги можарони ҳал қилиш йўлидаги ҳаракатларга очиқмиз. Доналд Трамп маъмурияти томонидан воситачилик қилишга қаратилган саъй-ҳаракатларни қадрлаймиз. Бироқ бизга босим ўтказишга уриниш — фойдасиз. Россия санкциялардан қўрқмайди, чунки аллақачон бизга қарши кўплаб санкциялар жорий этилган», — деди Дмитрий Песков CNN’га берган изоҳида.
Кремл матбуот котиби, шунингдек, Москва ҳозирча Европа томонидан Россия билан муносабатларни тиклашга тайёрликни сезмаётганини айтди.
«Биз Европадан кўплаб зиддиятли баёнотларни эшитмоқдамиз. Бундай баёнотлар ўзаро муносабатларимизни тиклашга йўналтирилмаган, балки қарама-қаршилик кайфиятидаги баёнотлардир», — деди Песков журналистларга.
Бундан ташқари Германия канцлери Фридрих Мерц агар бу Украина урушини тугатишга ёрдам берса, Владимир Путин билан шахсан учрашиши мумкинлигини айтган эди.
Бу баёнотни шарҳлар экан, Песков Россия президенти ҳар қандай давлат етакчиси билан алоқа ўрнатишга тайёр эканини ва «етакчилар ўзлари тайёр бўлган даражада мулоқот ва ҳамкорликка очиқлигини» таъкидлади.
