Ошпазлик фақат касб эмас, бу — ҳаёт тарзи!
Бугунги глобаллашув даврида ҳар бир ёш ўз йўлини, ўз чақириғини топишга ҳаракат қилади. Кимдир тадбиркорлик сари интилса, яна биров санъатга ошно бўлади. Аммо борлиқдаги ҳар бир касб — бир олам меҳнат, фидойилик ва юракка яқин бўлишни талаб қилади. Шу жумладан, ошпазлик ҳам!
Файзулла Нишонов ошпазлик санъатини юрагига сингдирган, бу касб орқали нафақат ўз орзу-умидларини рўёбга чиқарган, балки Ватанимизнинг маданий элчиси сифатида халқаро майдонларда юксак даражада танилган йигитдир.
Файзулла 1998 йил 9 июль куни Тошкент шаҳрида зиёлилар оиласида дунёга келган. 2005 йилдан 2014 йилгача умумий ўрта мактабида таълим олиб, кейинчалик 2014-2017 йилларда Тошкент шаҳридаги Туризм профессионал коллежининг ошпазлик йўналишини тамомлаган. Файзулла таълим жараёнида ҳар бир фанга, айниқса, амалий машғулотларга кат-та масъулият билан ёндашиб, коллежни қизил диплом билан тамомлагани бежиз эмас.
Ўқув йиллари давомида у кўплаб ошпазлик мусобақаларида фаол иштирок этиб, бир неча бор совринли ўринларни эгаллаган. Айниқса, мева ва сабзавотларни санъат даражасида ўйиб безатиш — яъни карвинг йўналишида юртимизда илк бор фаолият юритганлардан бири бўлди. Бу соҳадаги қобилияти билан 2015-2016 йилларда ўтказилган Тошкент туризм коллежининг мусобақаларида биринчиликни қўлга киритди.
Файзулланинг изланишлари Ўзбекистон билан чекланиб қолмади. 2018 йилнинг ёзида у Жанубий Кореянинг Сеул ва Инчхон шаҳарларида бўлиб, замонавий ошпазлик технологиялари бўйича билим ва кўникмаларини оширди. Бу жараёнда у ўзбек ошхонасининг нафисликларини корейс оммасига намойиш қилиб, миллий таомларимизни халқаро миқёсда танитишга ҳисса қўшди.
2019 йил эса унинг ҳаётида яна бир унутилмас давр бўлди. Файзулла АҚШда бўлиб, жаҳон таомлари тайёрлаш бўйича малакасини оширди. Америкадаги фаолияти давомида ҳам ўзбек миллий таомларини тарғиб этиб, кўплаб хорижликлар эътиборини тортди. Шу йили ноябрда Ўзбекистонда ўтказилган “Делисиоус Узбекистан” номли 1-халқаро пазандачилик санъати мусобақасида муваффақиятли иштирок этиб, тақдирланди. Ушбу мусобақада 200дан ортиқ хорижий ошпазлар иштирок этгани эса Файзуллани яна бир бор халқаро майдонга чиқишига сабаб бўлди.
Пандемия даври. Гўёки дунё тўхтаб қолгандек… Аммо ҳақиқий фидойилар учун бу синов эмас, имконият эди. Файзулла “Инстаграм” ижтимоий тармоғида “Чеф Сатеринг” саҳифасини очиб, ўз жамоаси билан тўйлар, туғилган кунлар, расмий тадбирларда иссиқ, мазали ва дид билан безатилган таомлар тайёрлаш хизматини йўлга қўйди. Бугун ушбу саҳифа 40 мингдан ортиқ обуначига эга. Бу эса ёшларга катта мотивация: меҳнат ва садоқат билан ҳар қандай орзуга эришиш мумкин!
“Ошпазлик орқали юрагимдаги Ватанга бўлган муҳаббатни дунёга тақдим этаман”, дейди Файзулла.
Бугунги кунда Файзулла Нишонов — Ўзбекистон ошпазлар уюшмаси аъзоси, халқаро миқёсда ўзбек ошхонасининг элчиси. У Гиннеснинг рекордлар китобига кирган 7 тонна 260 кг ош тайёрлаш тадбирида фаол иштирок этган. Бу эса унинг касбга бўлган муҳаббатини, фидойилигини яна бир бор исботлайди.
Яқин келажакда Файзулла ёш ошпазлар учун устозлик қилишни, карвинг санъати бўйича халқаро мастер-класслар ўтказишни, ўз ошпазлик мактабини ташкил этишни мақсад қилган. Бу орқали у ўз тажрибасини бўлишиб, юртимизда замонавий, инновацион ошпазлик маданиятини ривожлантиришга ҳисса қўшмоқчи.
Шу ўринда унинг ёш ошпазларга мурожаатини ҳам келтириб ўтмоқчимиз: “Қўлингиздаги пичоқ, бу — сизнинг қуролингиз. У билан фақат таом эмас, ҳаётингизни, орзуларингизни ҳам безайсиз. Ҳеч қачон орқага чекинманг. Чунки ошпазлик санъати сиз орқали яшайди!”
Ошпазлик, бу — санъат. Ошпазлик орқали маданият тарғиб қилинади, юраклар забт этилади, дунё Ўзбекистонни танийди!
Хулоса ўрнида: Ҳар бир ёшга айтмоқчимиз: Сизда иқтидор бўлса, унга ишонч ва меҳнат қўшинг. Чунки ҳар қандай оддий касб ҳам, агар унга муҳаббат билан ёндашилса, сизни юлдузларга олиб чиқади. Файзулла Нишоновнинг ҳаёт йўли бунга ёрқин мисолдир.
Ислом АСИЛБЕКОВ
«Ҳордиқ плюс» газетасининг 2025 йил 8 май, 19-сонидан.
