12 йиллик танаффусдан сўнг: АҚШ элчихонаси Сурияда қайта очилди
АҚШнинг Туркиядаги элчиси ва Суриядаги махсус вакили Томас Баррак 29 май куни Сурия пойтахти Дамашқдаги элчихона резиденциясида АҚШ байроғини кўтарди. Бу ҳодиса Суриядаги АҚШ элчихонаси 2012 йилда ёпилганидан бери биринчи марта юз берди. Бу ҳақда Kunuz хориж нашрларига таяниб хабар берди.
Элчихонанинг қайта очилиш маросимида Сурия ташқи ишлар ва муҳожирлар ишлари бўйича вазири Ҳасан ал-Шайбоний ҳам қатнашган.
Шунингдек, Сурия президенти Аҳмад аш-Шаръа ўз қароргоҳида ТИВ, мудофаа ва разведка хизмати раҳбарлари ҳамроҳлигида Томас Баррак билан учрашув ўтказган.
Reuters нашрига кўра, сўнгги ҳафталарда Сурия янги маъмурияти билан АҚШ тез суръатда алоқаларни тикламоқда. АҚШ президенти Доналд Трамп май ойининг ўрталарида Саудия Арабистонининг Риёд шаҳрида Сурия янги президенти Аҳмад аш-Шаръа билан учрашиб, Сурияга нисбатан санкцияларни юмшатишини айтган эди.
«Мен АҚШнинг Туркиядаги элчиси Том Баррак — Сурияга махсус вакил сифатида хизмат қилишини мамнуният билан эълон қиламан. Баррак — Сурияда экстремизмни тўхтатиш, муносабатларни яхшилаш ва Яқин Шарқда тинчликни таъминлаш бўйича катта имкониятлар борлигини тушунади. Биргаликда биз Американи ва бутун дунёни яна хавфсиз қиламиз!» — дея Трампнинг сўзларини келтирмоқда Давлат департаментининг Яқин Шарқ бўлими.
