Саудия Арабистонида Ҳажга зиёратчиларни ноқонуний олиб борган олти киши ҳибсга олинди
Ҳаж зиёрати билан боғлиқ қатъий қоидаларни четлаб ўтишга уринишлар бир неча кишининг ҳибсга олинишига, катта миқдорда жаримага тортилишига ва эҳтимолий қамоқ жазосига сабаб бўлди.
Саудия Арабистони Ички ишлар вазирлиги сешанба куни олти фуқаронинг Ҳаж қоидаларини бузгани учун ҳибсга олинганини маълум қилди. Улар Ҳаж зиёратини адо этиш учун расмий рухсатномага эга бўлмаган 20 кишини ноқонуний равишда Маккага олиб киришга уринган.
Ҳибсга олишлар Ҳаж мавсумида тартибни таъминлаш мақсадида Макка шаҳрига киришда кучайтирилган хавфсизлик чоралари доирасида амалга оширилди.
Вазирлик қарорига кўра, қоидабузарлар 100 минг Саудия риали (тахминан 13,6 миллион тенге) миқдорида жаримага тортилиши мумкин. Бундан ташқари, агар айбдор деб топилса, қамоқ жазоси ҳам назарда тутилган.
Расмийлар ноқонуний ташиш учун фойдаланилган автомашиналарни мусодара қилишга ва рухсатномасиз Ҳаж зиёратига бормоқчи бўлганларга 20 минг риал (тахминан 2,7 миллион тенге) миқдорида қўшимча жарима солишга қарор қилди.
Вазирлик қоидабузарларнинг исм-шарифларини эълон қилди, ҳодисага алоқадор бўлган хориж фуқаролари жазо муддатини ўтаб бўлгач, депортация қилинишини буюрди ва Саудия Арабистонига 10 йилгача қайта киришини тақиқлади.
Вазирлик барча фуқаролар ва аҳолини зиёратчилар хавфсизлиги ва фаровонлигини таъминлаш учун зарур бўлган Ҳажга оид белгиланган қоидаларга қатъий риоя қилишга чақирди.
Сешанба куни Саудия Арабистони расмийлари Ҳаж зиёратида қатнашиш учун мамлакатга 1,1 миллион киши келганини маълум қилди.
