Трамп крипто империясини қурмоқда
Трамп медиа компанияси биткоин захирасини шакллантириш учун 2,44 миллиард долларлик битимни якунлади.
Доналд Трамп оиласига алоқадор ва Truth Social ижтимоий тармоғига эгалик қилувчи Trump Media and Technology Group (ТМТГ) медиа компанияси 2,44 миллиард долларлик хусусий жойлаштириш тугалланганини тасдиқлади. Битим доирасида 1,44 миллиард долларлик акциялар ва 1 миллиард долларлик облигациялар жойлаштирилди.
2,32 миллиард долларлик соф маблағ биткоин захирасини яратиш ва бошқа корпоратив мақсадларга йўналтирилади. Trump Media раҳбари Девин Нунес айтишича, бу келишув компанияга «ўз стратегияларини амалга ошириш учун молиявий эркинлик» беради ҳамда «компания 3 миллиард доллардан ортиқ ликвид активларга эга бўлади, акциядорлар эса биткоиндан фойдаланиш имкониятига эга бўлишади».
Trump Media АҚШ оммавий компаниялари орасида энг йирик биткоин эгалари қаторига киришни мақсад қилган. Компания акцияларининг 60 фоизга яқини Доналд Трампга тегишли. Компания учун криптовалютани сақлаш вазифасини CryptoCom биржаси ва Anchorage Digital кустодиал хизмати бажаради.
