Трамп ва Си Цзиньпин савдо урушидан чиқиш йўлини изламоқда
АҚШ президенти маъмурияти Хитой томони билан давлат раҳбарлари – Доналд Трамп ва Си Цзиньпин ўртасидаги телефон суҳбатини уюштириш масаласини муҳокама қилаётгани ҳақида Оқ уйнинг икки юқори мартабали амалдори CNN телеканалига маълум қилди.
Уларнинг таъкидлашича, Трамп маъмурияти бу суҳбатни савдо музокараларини қайта бошлаш учун зарур деб ҳисобламоқда. Телеканал мухбирларига айтилишича, агар Пекин Женевада имзоланган битим доирасидаги мажбуриятларини бажармаса ҳам, Трамп ҳозирча Хитой товарларига 145 фоизлик божларни қайта жорий этишни кўзда тутмаяпти.
Шу билан бирга, иқтисодий соҳа амалдорлари президентга АҚШнинг «Хитойга зарар етказишнинг бошқа воситалари ва усуллари» мавжудлигини маълум қилишди. CNN манбасининг айтишича, кўриб чиқилаётган асосий вариантлардан бири Хитой товарларига нисбатан экспорт назоратини кучайтириш ҳисобланади.
