Украина 2 июн куни Россия билан ўтказиладиган музокараларда 30 кунлик вақтинчалик сулҳ ва янги асирлар алмашинувини таклиф этади
Бу ҳақда Reuters хабар бермоқда.
«Сулҳ режаси камида 30 кун давомида ўт очишни тўлиқ тўхтатиш, “барчани барчага” тамойили асосида асирлар алмашинувини ўтказиш, Россияга олиб кетилган украиналик болаларни қайтариш, шунингдек, Зеленский ва Путин ўртасида учрашув ўтказишни ўз ичига олади.
Режага кўра, Москва ва Киев АҚШ ва Европа иштирокида урушни бутунлай тўхтатиш шартларини ишлаб чиқиш устида ишлайди.
Бундан ташқари, асосий шартларга тинчлик шартномаси имзоланганидан сўнг Украинанинг ҳарбий салоҳиятига чекловлар қўйилмаслиги, Россиянинг Украина ҳудудлари устидан суверенитетини халқаро миқёсда тан олмаслик ва Москванинг Киевга товон тўлаши масалалари киритилган.
Ҳужжатда, шунингдек, фронт чизиғининг ҳозирги жойлашуви ҳудудлар бўйича музокаралар учун бошланғич нуқта бўлиши таъкидланган.
Reuters агентлигининг ёзишича, бу шартлар Россия сўнгги бир неча ҳафта давомида оммавий равишда илгари сурган талаблардан сезиларли даражада фарқ қилади.
