Трамп: «Си Жинпинг билан келишув қилиш жуда қийин»
АҚШ ва Хитой савдо бўйича келишувига эришолмаслиги мумкин. Доналд Трамп Си Жинпингни «жуда қаттиқ» ва келишувга бориши қийин етакчи деб атади. Бу айниқса камёб металллар экспортидаги баҳслар фонида содир бўлмоқда.
АҚШ президенти Доналд Трамп Хитой раҳбари Си Жинпингни «жуда қаттиқ ва келишувга келиш қийин» инсон сифатида тавсифлади. Бу баёнотлар икки давлат ўртасидаги Женевада имзоланган савдо келишуви бажарилишига оид баҳслар кучайган бир пайтга тўғри келмоқда.
Трамп Truth Social ижтимоий тармоғида: «Мен Ци Жинпингни ёқтираман, лекин у жуда қаттиқ ва келишув қилиш жуда қийин!!!» — деб ёзди. Ушбу фикрлар Трамп ва Си ўртасидаги сўнгги мулоқотга жавоб экани ҳозирча аниқ эмас.
Ўтган ҳафта Вашингтон Пекинни Женева келишувидаги мажбуриятларини бажармаётганликда айблади. Хусусан, Хитойнинг камёб металллар экспорти бўйича лицензиялар беришдаги сустлиги АҚШ саноатида узилишларга олиб келаётгани қайд этилди.
Бунга жавобан, Хитой ташқи ишлар вазири Ванг И АҚШнинг Пекинга қарши «асоссиз чекловлари» Женевадаги келишувга зид эканини таъкидлади. У АҚШнинг Huawei чипларига бўлган назоратни кучайтириши, чип лойиҳалаштириш дастурларини Хитой компанияларига сотишни тўхтатиши ва хитойлик талабалар визаларини бекор қилиши келишувга қарши ҳаракатлар деб баҳолади.
Женевадаги келишувдан сўнг икки давлат 90 кун давомида ўзаро тарифларни камайтиришга рози бўлган эди: АҚШнинг Хитой товарларига тарифлари 30 фоизга, Хитойнинг АҚШга нисбатан тарифлари эса 10 фоизга туширилган.
Шу билан бирга, Хитой АҚШга нисбатан но-тариф чораларини бекор қилиш ёки тўхтатишга рози бўлган, бироқ бу борада аниқ тафсилотлар тақдим этилмаган. АҚШ томони эса камёб металллар экспорти бўйича чекловлар бекор қилинишини кутган, аммо Пекин бу жараённи секинлаштиргани Вашингтондаги хавотирни кучайтирмоқда.
