Қирғизистон собиқ президенти сиртдан 11,5 йилга қамалди
Бишкекнинг Первомайск туман суди собиқ президент Алмазбек Атамбаевни қатор жиноятларни содир этганликда айбли деб топиб, уни сиртдан 11,5 йил қамоқ жазосига ҳукм қилди.
Атамбаев Чуй вилояти Қўй-Тош қишлоғида ер участкаларини ноқонуний йўл билан олганликда, коррупцияга йўл қўйганликда, шунингдек, 2019 йил да оммавий тартибсизликларни уюштирганликда айбдор деб топилган.
Бундан ташқари, собиқ президентнинг мол-мулки мусодара қилинади ва у барча давлат мукофотларидан маҳрум этилади.
Мазкур жиноят иши доирасида яна бир нечта юқори мартабали амалдор, жумладан, президент администрациясининг собиқ раҳбари Фарил Ниёзов ҳамда парламент собиқ депутати Ирина Карамушкина ҳам судланган. Ниёзов 7 йил 8 ойга, Карамушкина эса 7,5 йилга озодликдан маҳрум этилган.
