Калифорния губернатори Трамп маъмуриятини судга бермоқчи
Калифорния губернатори Лос-Анжелесга Миллий гвардияни юборгани учун Трамп маъмуриятини судга беришини маълум қилди.
«Бу айнан Доналд Трамп истаган нарса эди. У Миллий гвардияни федерал асосда қўллаш учун ноқонуний ҳаракат қилди. Трамп имзолаган буйруқ биргина Калифорнияга эмас, барча штатларга тааллуқли. Бу унга исталган штатга кириб, худди шу ишни қилиш имконини беради. Биз уни судга бермоқчимиз», — деб ёзди губернатор Гэвин Ньюсом Х ижтимоий тармоғида.
Аввалроқ Ньюсом Трампнинг Миллий гвардияни Лос-Анжелесга юбориш қарорини “ноқонуний” ва “ахлоққа зид” деб атаганди.
Нью-Йорк штатининг собиқ губернатори Эндрю Куомо эса Нью-Йорк шаҳри кейинги нишонга айланиши мумкинлигини айтди.
«Менимча, вазият янада оғирлашади ва навбат Нью-Йоркка келади», — деди Куомо Bloomberg’га берган интервюсида.
Куомонинг фикрича, Трампнинг Калифорния губернатори розилигисиз Лос-Анжелесга Миллий гвардияни юбориш қарори президент томонидан атайлаб тартибсизлик ва тўполонлар яратишга қаратилган сиёсий ҳаракат ҳисобланади.
Эслатиб ўтамиз, Лос-Анжелесда иммиграция хизматининг рейдларидан сўнг оммавий норозиликлар бошланганди. Шаҳарда полиция билан тўқнашувлар, автомобилларни ёқиш, талон-тарож ва оммавий ҳибсга олишлар содир бўлган.
Трамп шаҳарга 2000 нафар Миллий гвардиячини юборган, бу эса сиёсий жанжалга ва норозилик намойишининг янада кескин тус олишига сабаб бўлди.
