Маск унга Вэнс қўнғироқ қилганидан кейин Трамп билан очиқчасига жанжаллашишни тўхтатди – WSJ
АҚШ вице-президенти Жей Ди Вэнс Tesla эгаси Илон Маскни президент Доналд Трамп билан можарони тўхтатишга кўндирди, деб ёзади The Wall Street Journal манбаларга таяниб.
Нашр маълумотларига кўра, 6 июн куни (ижтимоий тармоқлардаги тортишувлардан бир кун ўтиб) Жей Ди Вэнс ва Оқ уй аппарати раҳбари Сюзи Уайлс Илон Маскка қўнғироқ қилиб, уни зиддиятга чек қўйишга чақирган. WSJ суҳбатдошларининг аниқлик киритишича, Вэнс Трампнинг ёнини олган, бироқ Маскнинг ҳаракатларини тўғридан-тўғри танқид қилишдан тийилган.
Маск вице-президентнинг маслаҳатларига қулоқ тутди, деб ёзади газета.
Маск ва Трамп миллиардер республикачиларнинг АҚШ бюджети тақчиллигини оширувчи солиқ имтиёзлари тўғрисидаги қонун лойиҳасини танқид қилганидан кейин жанжаллашиб қолишди. 5 июн куни улар ўртасида ижтимоий тармоқларда тортишув келиб чиққанди.
Бугун эрталаб эса Илон Маск Доналд Трамп ҳақидаги “айрим” постлари учун узр сўради.
