Кремль Нетаньяхунинг баёнотига жавоб қайтарди: “Исроил ҳаракатларини қоралаймиз”
Россия президенти матбуот котиби Дмитрий Песков Исроил бош вазири Биньямин Нетаньяхунинг Эрондаги ҳокимият ўзгариши ва Исроилнинг ҳужумлари ўртасидаги боғлиқлик ҳақидаги баёнотига муносабат билдирди.
“Биз бу баёнотни кўрдик, эшитдик ва ўқидик. Кремль тан олади: бу каби ҳаракатлар минтақадаги кескинликни хавфли даражада оширмоқда ва биз буни қоралаймиз”, — деди Песков кундалик брифингда.
Унинг таъкидлашича, Исроил томонидан амалга оширилаётган ҳужумлар фонида Эрон жамиятида ички бирлик ва консолидация кучаймоқда.
15 июн куни Fox News телеканалига берган интервьюсида Исроил бош вазири Биньямин Нетаньяху шундай деган эди:
“Эрон аҳолисининг тахминан 80 фоизи амалдаги режимни ағдаришни истайди. Исроилнинг ҳужумлари Эронда ҳокимият ўзгаришига олиб келадими? Бу мумкин, чунки Эрон режими жуда заиф”.
Кремль ушбу баёнотни кескин танқид қилар экан, минтақадаги вазиятни янада беқарорлаштириши мумкин бўлган ҳар қандай ҳаракатларга қарши эканини билдирди.
