100 фоиз ақлдан озган коммунист, — Трамп Нью-Йорк мери бўлиши кутилаётган мусулмон номзодни ҳақорат қилди
Доналд Трамп Нью-Йорк мери лавозими учун демократлар сафидан илгари сурилган номзод Зоҳран Мамдани ҳақида ижтимоий тармоқларда кескин фикр билдирди. У Truth Social платформасида эълон қилган постида Мамдани ҳақида “100 фоиз ақлдан озган коммунист” деган иборани ишлатди.
“Ниҳоят, демократлар чизиқни кесиб ўтишди. 100 фоиз ақлдан озган коммунист Зоҳран Мамдани Демпартиянинг бошланғич босқичида ғалаба қозонди ва энди шаҳар мери бўлиш арафасида. Олдин ҳам радикал чаплар бўлган, лекин бу сафар бу ҳолат кулгили тус олди”, — дея ёзди Трамп.
Маълум қилинишича, 33 ёшли демократик социалист Зоҳран Мамдани сешанба куни кечқурун Нью-Йорк мерлиги учун дастлабки сайловда ғалаба қозонганини эълон қилган. У илгари Нью-Йорк штати губернатори бўлган Эндрю Куомо истеъфога чиққанидан сўнг сиёсий майдонга фаол кириб келган.
Бироқ, сайлов натижаларининг якуний ҳолати ҳали рейтингли овоз бериш тизими орқали аниқланади. Агар натижалар тасдиқланса, Мамдани Нью-Йорк тарихидаги биринчи мусулмон ва ҳинд-америкалик мер бўлади.
Экспертлар таъкидлашича, либерал кайфият кучли бўлган Нью-Йоркда партия ичидаги бошланғич сайловлар кўпинча ноябрь ойидаги якуний сайлов натижасини белгилаб беради.
Маълумот учун, ҳозирда Нью-Йорк шаҳар мери лавозимини Эрик Адамс эгаллаб турибди. У 2022 йил январь ойидан буён шаҳар раҳбари ҳисобланади ва 110-мер сифатида фаолият юритмоқда.
