Энди қамоққа олинганлар тергов ҳибсхонасига жойлаштирилишдан аввал мажбурий тиббий кўрикдан ўтказилади
Ўзбекистон қонунчилигига киритилган янги ўзгартиришларга кўра, эндиликда қўлга олинган шахслар тергов ҳибсхонасига жойлаштирилишидан аввал мажбурий тиббий кўрикдан ўтказилади.
Мажбурий тиббий кўрик қамоққа олинганлар тергов ҳибсхонасига олиб келинган пайтдан эътиборан 2 соат ичида ўтказилади. Бунда қамоққа олинганнинг розилиги билан унинг адвокати ҳам иштирок этиши мумкин.
Тиббий кўрик натижалари бўйича белгиланган намунадаги тиббий маълумотнома расмийлаштирилади.
Тиббий кўрик чоғида қамоққа олинганнинг танасида жароҳат, шикастланиш ва яралар аниқланганда, улар белгиланган тартибда қайд этилиб, бу ҳақда қамоққа олинганга маълум қилинади ва зудлик билан прокурорга хабар берилади.
