Россия Украинага рекорд миқдордаги дрон ва ракеталар билан ҳужум уюштирди
Украина Қуролли кучларига кўра, Россия мамлакат ҳудудига кечаси ва эрталаб 477 та ҳужумчи дрон ва 60 та турли русумдаги ракеталар, жумладан “Кинжал” ва “Искандер-М” ракеталари билан ҳужум уюштирди. 436 та дрон ва 38 та ракета уриб туширилган.
«Россиянинг кенг кўламли ҳужумини қайтариш вақтида Украина Қуролли кучларининг F-16 самолёти шикастланди ва 1-даражали ҳарбий учувчи, подполковник Максим Устименко қаҳрамонларча ҳалок бўлди. Учувчи самолётни аҳоли пунктидан узоқлаштиришга улгурган, бироқ катапулта қилишга улгурмаган», дея хабар берди Украина Қуролли кучлари.
Черкасси вилоятининг Смела шаҳрига уюштирилган ҳужум оқибатида камида олти киши, жумладан бир бола жароҳат олди. Маҳаллий ҳарбий маъмурият раҳбари Игор Табурецнинг хабар беришича, учта тўққиз қаватли уй, коллеж биноси ва бошқа фуқаролик инфратузилмаси зарар кўрган.
Маҳаллий ҳокимият вакилларига кўра, Николаев шаҳри баллистик ракеталар билан нишонга олинган, натижада инфратузилма объектида ёнғин юзага келган. Полтава вилоятининг Кременчуг туманида ҳам корхона ҳужумга учраган ва ёнғин чиққан. Лвов шаҳрида Россия қўшинлари муҳим инфратузилмани нишонга олишга уринган, бироқ ҳужум қайтарилган.
Бундан ташқари, Ивано-Франковск вилоятида ва Харковнинг бир турар-жой массивида ҳам дрон парчалари тушгани қайд этилган, Харковда бир аёл жароҳат олган. Запороже шаҳрига уюштирилган ракета зарбаси натижасида бир корхона зарар кўрган.
