1 августдан Евроиттифоқ ва Мексика маҳсулотлари импортига божлар 30 фоизгача оширилади – Трамп
АҚШ президенти Доналд Трамп Мексика президенти Клаудия Шейнбаум ва Еврокомиссия раҳбари Урсула фон дер Ляенга йўллаган хатларини ўзининг Truth Social ижтимоий тармоғида эълон қилди.
Трампнинг изоҳ беришича, Мексикадан импорт қилинадиган маҳсулотлар учун божларнинг оширилишига мамлакат ҳуқуқни муҳофаза қилиш органларининг наркокартелларга қарши курашда етарлича ҳаракат қилмаётгани сабаб бўлган. Европа маҳсулотларига нисбатан бож ставкасининг оширилиши эса савдо номутаносиблигига қарши кураш зарурати билан изоҳланган.
Трамп импорт божлари оширилиши ҳақида дастлаб 2 апрел куни эълон қилган эди. Шундан сўнг, у Қўшма Штатларнинг савдо ҳамкорларига Вашингтон билан муросага эришиш учун 90 кунлик муҳлат берган, бироқ шу вақт ичида фақат айрим давлатлар, жумладан, Буюк Британия бу бўйича келишувга эришган.
Шундан бери Трамп музокаралар учун белгиланган муддатни 1 августга сурди, бироқ у мазкур санани кутмасдан бир қанча давлатлардан импорт учун божларни ошириш чораларини эълон қила бошлади.
