«Биз Путиндан фақат бўш гап эшитяпмиз». Трамп Владимир Путиндан умидини узди

АҚШ президенти Дональд Трамп Россия президенти Владимир Путин билан беш ойлик мулоқотдан сўнг тинчликка бўлган умидлардан тўлиқ хафагарчиликкача бўлган йўлни босиб ўтди. Президентликнинг иккинчи муддати бошланиши билан Трамп Украинадаги урушни тўхтатиш учун Путин билан шахсий мулоқотга умид қилган эди. Бироқ олти марта телефонда гаплашганига қарамай, натижа бўлмади — аксинча, ҳар бир суҳбатдан кейин Россия ҳужумларни янада кучайтирди.

«Ростини айтсам, биз Путиндан фақат бўш гап эшитяпмиз. У доимо жуда одобли, лекин охирида ҳеч қандай фойда йўқ», — деди Трамп яқиндаги баёнотида.

У бу сўзлар билан Путинни тинчлик сари қадам қўйишга ундаш бўйича навбатдаги уринишнинг муваффақиятсиз тугаганини изоҳлади. Масалан, учинчи суҳбатдан сўнг Трамп ижтимоий тармоқда «Россия ва Украина дарҳол музокараларни бошлайди» деб ёзган эди. Бироқ ортидан уч кун ўтиб, Москва Украинага яна бир йирик ҳужум уюштирди.

«У (Путин) бутунлай ақлдан озган! У бекорга жуда кўп одамларни ўлдиряпти, ва мен бу ерда фақат аскарлар ҳақида гапирмаяпман. Ракеталар ва дронлар Украина шаҳарларини ҳеч қандай сабабсиз ўққа тутяпти», — деб ёзди Трамп навбатдаги бомбардимондан сўнг.

Ҳозирда АҚШ президенти Кремлнинг тинчлик истагига ишонмаётгани кўринади. Яқинда Путин ва Трамп ўзаро иқтисодий лойиҳалар ҳақида суҳбатлашганига қарамай, Россия уруш бошланганидан бери энг катта ҳужумни амалга оширди — бир кеча-кундузда 500 дан ортиқ дрон ва ракета учирилди.