Буви ўғлининг алиментини пенсиясидан тўлади

Буви МИБ ходимларига бу ишни «ўғлининг жавобгар бўлмаслиги ва неварасининг отага бўлган меҳри узилмаслиги учун» қилганлиги билдирган.

Фарзандлари таъминоти учун алимент тўлашдан бўйин товлаш бола ҳуқуқларининг поймол қилинишига олиб келади. Афсуски, бундай ҳолатлар ҳаётда учраб туради.

Мажбурий ижро бюросининг Зомин туман бўлими давлат ижрочисининг саъй-ҳаракатлари билан М.К. исмли фуқародан 20 миллион сўмга яқин алимент қарзи ундирилди. Суд қарорига кўра, М.К. вояга етмаган фарзанди учун собиқ турмуш ўртоғи Ф.М.га алимент тўлаши керак бўлган, аммо бу мажбуриятини бажармай келган.

Бундан хабар топган алимент тўловчи фуқаро онаси С.И. ўғли жавобгар бўлмаслиги учун ўз пенсиясидан тўплаб юрган пулни неварасининг алименти учун ўтказиб берди.

Шундан сўнг, бувининг пуллари келинининг пластик картасига ўтказиб берилган.

Қарзни тўлаш жараёнида бувининг меҳрли кўзлари унинг неваралари келажаги ҳақида ўйлаётганидан далолат берарди.