Украинанинг Ўзбекистондаги элчиси ўз миссиясини якунлаяпти
Украинанинг Ўзбекистондаги Фавқулодда ва Мухтор элчиси Никола Дорошенко ўз миссиясини якунлаётганини маълум қилди.
Бу ҳақда Украина Президенти Владимир Зеленский тегишли қарорни қабул қилган.
«Бу менинг юртим, халқим раҳбариятининг юксак ишончидир ва мен буни оқлаш учун бор куч-ғайратимни сарфладим. Мен чуқур мотивация ва бор кучим билан Украина ва Ўзбекистон ўртасидаги ҳамкорликни ҳар томонлама ривожлантиришга ҳисса қўшдим. Мен ўз ишимни баҳолаш ҳуқуқини бошқаларга қолдираман ва ишонч билан айтаманки, қилган ишларимдан уялмайман. Мен учун қийин даврда – уруш даврида давлат манфаатларини ифодалаш ва ҳимоя қилиш шарафига муяссар бўлдим», – деб ёзади Дорошенко.
Элчи жаноблари ўзининг зиммасига Россия билан уруш ҳолатидаги Украина ҳаёти ҳақида ўзбек жамиятига ҳақиқатни етказиш, уларга бугунги Украина нима билан яшаётгани, унинг ўғил-қизлари қандай ва нима учун ҳалок бўлаётганини тушунтириш вазифаси юкланганини таъкидлайди.
У, шунингдек Украинани қўллаб-қувватлаган ўзбек жамияти учун ўз миннатдорлигини билдирган.
Эслатиб ўтамиз, Никола Дорошенко 2020 йил апрель ойида Украина элчиси этиб тайинланган эди. Ўша йилнинг октябрь ойида у Ўзбекистон Президентига ишонч ёрлиқларини топширган.
