Каримберди ака, сал кечироқ кўрибман…

Ким нимани тушунганини изоҳларда ёзсин!

Билганлар билади, маълум сабабларга кўра, мен «ўша воқеалар»дан кейин ёзмаётган ва энди ҳеч нарса ёзмасликка қарор қилгандим. Аммо бугун бир эълонни кўриб, ёзмасдан туришнинг иложи бўлмади.

«Air Samarkand» эълони:

«Iyul oyidan boshlab ayrim reyslarimizda issiq ovqat berilishi toʻxtatiladi. Buning oʻrniga sizga tovuq yoki kurka goʻshti va sabzavotlar bilan tayyorlangan yangi sendvichlar, choy, qahva hamda salqin ichimliklar taklif etiladi.

Bu nima uchun zarur? Chunki biz shunday yoʻl bilan:

chipta narxlarini pasaytira olamiz,

barcha yuk va qoʻl yuki samolyotga sigʻishini kafolatlay olamiz,

chipta xarid qilgan barcha yoʻlovchilarni olib ketish imkonini ta’minlaymiz.

Issiq ovqat — bu katta hajm va ogʻirlik demakdir, ba’zida u kimningdir joyini egallashi ham mumkin!

Алоҳида:

Samarqand – Tel-Aviv yoʻnalishidagi reyslarda esa ovqatlanish tartibi oʻzgarmaydi. Yoʻlovchilarga avvalgidek issiq ovqat, jumladan, kosher menyusi taqdim etiladi.

Tushunganingiz uchun rahmat va sizga yoqimli parvoz tilaymiz!»

Нимани тушунганимиз учун раҳмат айтишаяпти, деб ўйлайсиз?

Мен 3-июл куни Истамбулдан Самарқандга «Air Samarkand» самолётида учиб келдим. Парвоздаги кўнгилсизликларни ёзишдан тийилиб тургандим, мана, бугунги эълонлари «тормоз»имни ишдан чиқарди. Ўша куни самолётда овқат берилмади, салқин ичимликлар ҳам берилмади. Фақат «баклашка»да сув берилди аммо кўпчилик бу сувни ича олмади. Мен ҳам. Сабаби сувдан жуда қўланса резина ҳиди анқиб турган эди. Жуда кўп йўловчилар стюардессага эътироз билдиришди, аммо стюардесса «Сувни биз ишлаб чиқармаганмиз», деди.

Қизиқ, сувни «COCA-COLA» компанияси ишлаб чиқарган экан!

Бу компания қаерники эди ва унинг даромадлари кимга хизмат қилар эди, эслай олмаяпман, биладиганлар борми?

Бўлаётган ҳамма ишларда қандайдир боғлиқлик борга ўхшамаяптми? «Бу ёқда Шпагнинг магнитофони?»

Мен товламачиларнинг «WIZZZ» компанияси саргузаштларидан кейин барча юртдошларимни «Air Samarkand» самолётларида учишга тарғиб қилиб келаётган эдим. Афсус, сал шошганга ўхшаяпман…

Самарқандимники, деб мен фахрланиб юрган авиакомпаниянинг асл эгаси кимлиги ҳақида шу бугун шубҳаланиб қолдим. Жудаям шубҳаланмоқдаман!