Трампнинг сабри тугаб бормоқда, у Путин билан суҳбатлар урушни якунлашга олиб келмаётганидан норози — АҚШ Давлат котиби
Марко Рубионинг Fox News телеканалига берган интервюсида айтишича, президент Доналд Трамп Украинада тинчликка эришишни ўзи учун асосий мақсад деб билади.
«Менимча, Владимир Путин билан яхши алоқалар ва телефон суҳбатларига қарамай, бу ҳеч қандай аниқ натижага олиб келмаётгани Трампнинг ҳафсаласини пир қилган. Шунинг учун амалий чоралар кўриш вақти келди. Менимча, президент буни аниқ баён қилди. Трампнинг сабри тугаб бормоқда, у Россиянинг Украинадаги урушни тўхтатишни узоқ вақт кутиб ўтиришга тайёр эмас», — дея таъкидлади Давлат департаменти раҳбари.
Рубионинг сўзларига кўра, 2025 йил январидан бери Украина урушида Россия 100 минг нафардан ортиқ аскарини йўқотган.
«Бу “қонли можаро”, бироқ кўплаб музокаралар вақтдан ютиш ва тинчликка қизиқиш бор деган кўринишни яратишдан нарига ўтмаяпти. Президент Доналд Трамп “чексиз музокаралар тузоғига тушишни” режалаштирмаяпти», — дея қўшимча қилди Рубио.
