Тбилисида жаҳон чемпионатига келган россиялик қиличбозлар яшаётган меҳмонхона олдида норозилик акцияси ўтказилди — ОАВ
Хабар берилишича, 26 июл куни кечқурун Грузия пойтахтида жаҳон чемпионатида иштирок этиш учун келган россиялик қиличбозлар жойлашган меҳмонхона олдида норозилик намойиши бўлиб ўтди. Акция иштирокчилари пиротехника воситаларини ёқишган ва «Рус чўчқалари, сиз бу ерда керак эмассиз! Бугун — фейерверк, эртага эса — “Град”лар!» деб ёзилган баннерлар кўтаришган.
27 июл куни кундузи Тбилисидаги Спорт саройи олдида ҳам шунга ўхшаш норозилик акцияси бўлиб ўтди.
Маълумотларга кўра, Россия қиличбозлар жамоаси таркибида 25 нафар спортчи мусобақада иштирок этмоқда, улардан 17 нафари ҳарбий унвонга эга. Улар орасида Олимпиада чемпионлари Софя Великая ва Яна Егорян ҳам бор — иккиси ҳам Россия президентлик сайловларида Владимир Путиннинг ишончли вакиллари бўлган.
