Кўкдаладаги газ портлаши оқибатида 10 синф қиз ҳам вафот етди
2025 йилнинг 16 июль куни Қашқадарё вилоятининг Кўкдала туманида аҳолига суюлтирилган газ баллонлари тарқатиш шохобчасида портлаш содир бўлганди. Масъуллар воқеадан сўнг, портлаш ва ундан келиб чиққан ёнғин 4 кишининг умрига зомин бўлганини очиқлаганди. Воқеадан хабардор манбанинг билдиришича, шифохонага ётқизилиб, комада қолаётган 10 синф қиз ҳам вафот этиб, ўлимлар сони ортган.
Портлаш ҳудудида бўлиб, тафсилотларни ўрганган «Дарё» нашри расмийлар ўлимлар сонини очиқлашда жамоатчиликни чалғитаётганини ҳикоя қилганди. ОАВ вакили билан суҳбатлашган аҳоли вакиллари ўша куннинг ўзида ўлимлар бештага етганини, масъуллар 4 киши вафот этган деб ёлғон маълумот бераётганини айтганди.
Аниқланишича, 16 июль куни газ шохобчасининг ёнидаги оилавий ресторанда чиққан ёнғиндан жабрланиб, шифохонага ётқизилган ва 20 июль ҳолатига кўра комада қолаётган қиз кўп ўтмай вафот этган. Қиз комадан чиқмади, вафот этди, дейди бу ҳақда билдирган манба. Фожиа оқибатида вафот этган Дилноза исмли қиз воқеанинг олтинчи қурбони. Аммо расмийларга кўра, бу ўлим бешинчи ўлим.
