Донецкни жангсиз топшириш режаси — Украина учун стратегик ҳалокат бўлиши мумкин
Жума куни кечқурундан бошлаб оммавий ахборот воситаларида 15 август куни Аляскада АҚШ президенти Дональд Трамп ва Владимир Путин муҳокама қилмоқчи бўлган «тинчлик режаси» ҳақидаги тафсилотлар тарқала бошлади. Агар ОАВдаги маълумотлар тўғри бўлса, бу режа украиналикларнинг хавотирларини амалда тасдиқлайди, деб ҳисоблайди BILD нашрининг ҳарбий шарҳловчиси Юлиан Рёпке. Режа Россияга Донецк ва Луганск вилоятларини топшириш, эвазига эса Россиянинг Запорожье ва Херсон вилоятларидаги ҳужумларини тўхтатишни назарда тутади.
Бундесвер университети сиёсатшунослик профессори Карло Масала Киев нима учун ҳеч қандай хавфсизлик кафолатларисиз ҳудудлар алмашинуви асосида тинчликка рози эмаслигини изоҳлайди:
«[Оқ отишни тўхтатиш] бўйича таклифлар, ҳозирги кўринишида, ҳарбий нуқтаи назардан фақат Россияга фойда келтиради».
Агар Украина Қуролли Кучлари ҳеч қандай жангсиз бир қисм ҳудуддан чиқиб кетса — бу Россия армиясининг Украина марказига яқинлашишига йўл очади. Ҳеч қандай хавфсизлик кафолатисиз «Россия ҳар қандай пайтда жанг ҳаракатларини қайта бошлаши мумкин» — лекин бу сафар анча қулай стратегик позициядан, дейди Масала.
Ҳарбий таҳлилчи Торстен Хайнрих ҳам шунга ўхшаш фикрда. У Россия ва Украина ўртасидаги урушни ўзининг YouTube-каналида бир неча вақтдан бери таҳлил қилиб келмоқда. BILD нашрига берган интервьюсида у шундай деди:
Россия армияси «Донбассда муваффақият қозона олмаяпти, чунки бу ҳудудда зич қурилиш ва тоғли ерлар жуда кўп. Бу ҳудуддан воз кечиш — россияликларга украиналиклар томонидан қурилган йирик мудофаа иншоотларини топширишдир, бу иншоотлар россияликларни анча вақт тўхтатиб турди. Бу билан бирга Украина саноат ва конларга эга йирик шаҳарлардан ҳам воз кечган бўларди, бу эса мамлакатни янада заифлаштиради».
Агар бундай келишув амалга ошса, у ҳолда:
«Жуда заифлашган Украина кучлироқ Россияга юзма-юз қолар эди, Россия эса Америка диққати тарқалишини кутган ҳолда навбатдаги қуролли можарога тайёргарлик кўраётган бўлади», — дея таъкидлади Хайнрих.
Institute for the Study of War (ISW) таҳлилий маркази ҳам бу хавотирларни тасдиқлайди:
«Донецк вилоятининг қолган қисмидан воз кечиш ва уни тинчлик келишуви учун топшириш, лекин узил-кесил сиёсий ҳал этиш шартисиз — Россия армиясини жуда қулай ҳолатга қўяди».
Сабаби шундаки, россияликлар бундай келишув орқали оғир ва қонли жангдан қутулган ҳолда, кейинчалик бундан ҳам қулай шартларда ҳужумларни қайта бошлаши мумкин бўларди.
