Озарбойжон ТИВ Боку ва Ереван ўртасидаги тинчлик келишувининг тўлиқ матнини эълон қилди
Мазкур ҳужжат Вашингтондаги учрашувда имзоланган бўлиб, Озарбойжон ва Арманистон ўртасидаги тинчлик келишуви қуйидаги бандлардан иборат:
◾️ Чегараларни тан олиш — томонлар бир-бирининг суверенитетини, ҳудудий яхлитлигини, чегараларнинг дахлсизлигини ва сиёсий мустақиллигини тан олади ва ҳурмат қилади (собиқ СССР иттифоқдош республикалари чегаралари халқаро чегаралар деб ҳисобланади);
◾️ Ҳудудий даъволардан воз кечиш — томонлар ҳозирда ва келажакда бир-бирига ҳудудий талаблар қўймайди ва бошқа томоннинг яхлитлиги ёки сиёсий бирлигини бузувчи ҳаракатларни қўллаб-қувватламайди;
◾️ Куч ишлатмаслик — томонлар бир-бирига қарши куч ишлатмайди ва куч ишлатиш билан таҳдид қилмайди, шунингдек, учинчи томонларга ўз ҳудудидан тажовуз учун фойдаланишга рухсат бермайди;
◾️ Ички ишларга аралашмаслик — икки давлат бир-бирининг сиёсати ва ички ишларига аралашмаслик мажбуриятини олади;
◾️ Дипломатик алоқалар — келишув ратификация қилингандан кейин белгиланган муддат ичида 1961 ва 1963 йиллардаги Вена конвенцяларига мувофиқ дипломатик муносабатлар ўрнатилади;
◾️ Чегараларни белгилаш — чегарани делимитация ва демаркация қилиш бўйича музокаралар учун махсус комиссия тузилади;
◾️ Чегарада қўшинлар бўлмаслиги — демаркация жараёни якунлангунига қадар чегарада учинчи кучлар жойлаштирилмайди, ишонч ва хавфсизлик чораларини амалга ошириш кўзда тутилади;
◾️ Экстремизмга қарши кураш — муросасизлик, ирқий нафрат, сепаратизм ва терроризмга қарши қўшма чоралар кўрилади;
◾️ Бедарак йўқолганлар масаласи — томонлар бедарак йўқолганларнинг тақдирини аниқлаш, маълумот алмашиш, жасадларни қайтариш ва тергов ўтказишни мажбурият сифатида олади;
◾️ Ҳамкорлик — иқтисодиёт, транспорт, экология, гуманитар ва маданий соҳаларда алоҳида келишувлар тузилиши мумкин;
◾️ Ижрони назорат қилиш бўйича қўшма комиссия — келишувнинг бажарилишини назорат қилиш учун икки томонлама орган тузилади;
◾️ Низоларни ҳал қилиш — барча низоларни музокаралар орқали ҳал қилишга ҳаракат қилинади, агар 6 ой ичида натижа бўлмаса, бошқа тинч йўллар билан ҳал қилинади;
◾️ Даъволарни қайтариб олиш — келишув кучга киргандан кейин бир ой ичида томонлар ўзаро ва халқаро судларга оид барча эски даъволар, шикоятлар ва низоларни қайтариб олади;
◾️ Келишувнинг кучга кириши — ички тартиб-таомиллар якунланганини тасдиқловчи ҳужжатлар алмашилганидан сўнг тинчлик келишуви БМТда рўйхатга олинади ва кучга киради.
