Уиткофф Путинни нотўғри тушунганми?
Bild нашри Украина ва Германия ҳукумат манбаларига таяниб хабар беришича, АҚШ президентининг махсус вакили Стивен Уиткофф Москвадаги музокаралар чоғида Россия президенти Владимир Путиннинг таклифини нотўғри англаган бўлиши мумкин.
Аввалроқ оммавий ахборот воситаларида Путин гўёки Запорожье ва Херсон вилоятларидан воз кечишга тайёрлиги, фақат Донбассдан украин қўшинлари чиқарилишини талаб қилаётгани ҳақида хабарлар тарқалган эди. Аммо Bild манбаларига кўра, бу хулоса Уиткоффнинг тушунмовчилигига асосланган.
Манбаларнинг айтишича, Путин музокарада Украина қўшинларининг Запорожье ва Херсон вилоятларидан «тинч йўл билан чиқиши»ни назарда тутган, Уиткофф эса буни Россия қўшинларининг чиқиши сифатида қабул қилган.
Ҳақиқатда эса Путин Донецк, Луганск, Запорожье ва Херсон вилоятларини тўлиқ назорат қилиш ниятидан қайтмаган. У фақат энергетик объектлар ва орқа шаҳарларга ҳужумларни тўхтатишни таклиф қилган, яъни тўлиқ оташкесим эмас, балки қисман уруш ҳаракатларини тўхтатиш ҳақида сўз борган.
Bild манбаларига кўра, АҚШ эса фронт бўйича вазиятни музлатиш, айрим санкцияларни бекор қилиш ва Россия билан иқтисодий келишувлар устида ишлашни таклиф қилган, аммо Кремль бу таклифни рад этган.
Музокаралардан сўнг АҚШ расмийлари Европа иттифоқи давлатлари билан телефон орқали маслаҳатлашув ўтказган. Европаликлар эса АҚШнинг музокара моҳиятини тўлиқ тушунмаётганидан хавотир билдиришган.
Шу билан, Уиткоффнинг нотўғри тушунчи орқали берган сигнали Ғарбда тушунмовчиликларга сабаб бўлди.
