Сербия президенти учинчи муддатга сайланмасликка ваъда берди
Сербия президенти Александр Вучич 13 август куни яна президентликка номзодини қўйиш учун мамлакат конституциясини ўзгартирмоқчи эмаслигини маълум қилди. Бу ҳақда у Белградда Австрия канцлери Кристиан Штокер билан учрашув якунлари бўйича ўтказилган матбуот анжуманида айтиб ўтди.
«Мен сиёсий фахрийман, энди президентликка номзодимни қўя олмайман ва номзодимни қўйишда давом этиш учун конституцияни ўзгартириш хаёлимга ҳам келмаяпти. Мен Австрия ОАВга кўра сиз тасаввур қилганингиздек диктатор эмасман, бир ярим йилдан кейин президентлик фаолиятимни якунлайман», — деди Вучич австриялик журналистнинг саволига жавобан.
Сербия президентининг қўшимча қилишича, у келгусида ҳам сиёсий фаолиятда иштирок этишда давом этади, бироқ ҳозир қандай позицияни эгаллашини очиқламади.
55 ёшли Вучич Сербия президенти лавозимини 2017 йил июнидан буён эгаллаб келмоқда, у 2022 йил апрелида иккинчи муддатга қайта сайланганди. Бунгача Вучич 2014 йилдан 2017 йилгача Сербия ҳукуматини бошқарган.
2006 йилги Сербия конституциясига кўра, президент 5 йил муддатдан кўпи билан икки марта сайланади.
