АҚШ Жанубий Корея билан қўшма ҳарбий машғулотларни бошлади
АҚШ ва Жанубий Корея ҳарбийлари КХДР таҳдидларига қарши биргаликда мудофаа тайёргарлигини кучайтиришга қаратилган йиллик Ulchi Freedom Shield (UFS) машғулотларини бошлади.
Yonhap агентлиги маълумотларига кўра, 11 кунлик манёврлар 28 августгача давом этади. Вашингтон ва Сеул ҳар йили ўтказадиган қўшма машғулотлар икки мамлакатнинг Пхенян «таҳдидларига» қарши мудофаа қобилиятини кучайтиришга қаратилган.
Бу йил «ҳақиқий» таҳдид сценарийсига асосланган манёврларда 18 мингга яқин Жанубий Корея ҳарбийлари иштирок этмоқда. UFS доирасида бир вақтнинг ўзида 580 минг киши иштирокида тўрт кунлик фуқаролик мудофааси машғулотлари ўтказилади, шунингдек, дронлар ва киберҳужумларга қарши ҳаракатлар машқ қилинади.
Пхенян бундай машғулотларни анъанавий равишда «босқинчилик репетицияси» деб атайди, АҚШ ва Жанубий Корея эса уларнинг фақат мудофаа хусусиятига эга эканини таъкидлайди.
