Ниагара шаршараси яқинида автобус ҳалокатга учради
Ниагара шаршараси яқинида юз берган автобус ҳалокати туфайли бир неча киши ҳалок бўлди, ўнлаб одамлар жароҳатланди, деб хабар бермоқда BBC.
Нашрнинг хабар беришича, Ниагара шаршарасидан Нью-Йоркка сайёҳларни олиб кетаётган автобус йўлдан чиқиб кетиб, ағдарилган. Ҳодиса оқибатида 5 киши, жумладан бир бола ҳалок бўлган, ўнлаб одамлар жароҳатланган. Автобусда жами 52 киши бўлган.
Нью-Йорк штати полицияси қурбонлар сони янада ошиши мумкинлигини билдирди.
Маҳаллий ҳокимият хабарига кўра, жароҳат олганларга таржимонлар ёрдам бермоқда, чунки жабрланганларнинг аксарияти Ҳиндистон, Хитой ва Филиппиндан келган сайёҳлар ҳисобланади.
Ҳалокат сабаблари ҳозирча номаълум. Гувоҳларнинг айтишича, автобус бошқарувни йўқотиб, қарама-қарши йўлга ўтиб кетган ва ағдарилган.
