Ўзгаришга юз тутган Карим Баҳрев!..
16 АСРДА ЯШАГАН ТУРК ТАСАВВУФ ШОИРИ ПИР СУЛТОН АБДОЛДАН ЯНА БИР ШЕЪР ЧЕВИРМАСИ
ПИР СУЛТОН АБДОЛ
ҒОФИЛ БЎЛМА, ШОШГИН …
Ғофил бўлма, шошгин – бир кун ўларсан,
Ёлғон дунё сенинг бўлса – не фойда?!
Оқибат олурлар ширин жонингни,
Булбул каби тилинг бўлса – не фойда?!
Сўзларсану сўзга назар солмассан,
Ҳалолдан, ҳаромдан ризқинг – билмассан.
Насибанг кесилса, сув ичолмассан,
Оқар сойлар сенинг бўлса – не фойда?!
Сўзлайсан-да, эл ичида сўзинг бор,
Елиб, югурасан – ўғлинг, қизинг бор…
Бу дунёда уч-беш аршин бўзинг бор,
Бозор, дўконларинг бўлса – не фойда?!
Бир кун гўрга келтирарлар уйингдан –
Ҳақ каломин қўйма асло тилингдан.
Қутулмассан Азроилнинг қўлидан,
Дунё тўла молинг бўлса – не фойда?!
Пир Султон Абдолман, келдик, ўтирдик,
Қазо луқмасини бирга тотиндик.
Дунё бизники деб тортдик, тортишдик,
Ёлғон дунё бизнинг бўлса – не фойда?!
Карим БАХРИЕВ таржимаси
