Нима бўлса бўлсин, дўхтирга ишинг тушмасин!..

Бугун куним югур-югур билан ўтди. Қизимнинг қулоғи оғриди ЛОРга бордик. Поликлиникамиздаги лор хонада ювиш жиҳозлари йўқ бўлгани учун Кўксарой клиникасига олиб бордим. У ерда ЛОРнинг қабулига 180 минг тўлаб кирдик. Дўхтир қизимни обдон текшириб, бу мени касалиммас, невропотологга боринглар, деди. Яна кассага тушдим аввалги 180 мингга 20 минг қўшиб, 200 минг «доплата» қилдим. Невропотолог кўриб бўлгач, у ҳам бошқа мутахассис – гнотолгга (жаҳ жарроҳи) йўналтирди.

Пулимни қайтариб беришди (инсофли клиника экан). Эски ТошМИга обордим. У ерда бизни янги очилган Болалар тиббиёт миллий марказига йўналтиришди. Ана ўша ерда ғаройиботлар бошланди.

Эшик тагида ўтирадиган (рецепшн) қиздан суриштирсам, у қўлимдаги йўлланмани олиб узоқ йўқ бўлиб кетди. Кейин коридор охиридаги хонага боринг деди. Бордим, у ерда ҳамшира, Фалончиев деган мутахассисимиз бор навбатда кутиб қолманглар деб сизларни чақиртириб олдим (меҳрибонлигини қаранг, аслида навбатда ҳеч ким йўқ эди), деди. Рўйхатдан ўтиб келинглар деди.  Ҳамшира бизни етаклаб келгани борганида биз рўйхатхонани олдида ўтиргандик. Наилож, келган жойимизга – рўйхатхонага қайтдик, рўйхатдан ўтдик, кассага 100 минг тўлаш керак экан, тўладик. Бу орада оғриқ кучайиб, қизимни қўли лунжидан тушмаётганди.

Ҳаммасиданам қизиғи Миллий марказ халқники деб хато ўйлаган эканман, эшикданоқ кассага пул тўлайсиз кейин вахтёр турникетдан беморни ичкарига киргизади, ҳудди концерт ёки театрга тўлов чиптасини текшириб киргизгандек. Қанча бемор бу ерга умид билан келиб, етарли маблағи бўлмаганидан ноумид қайтган экан деб ўйладим. Ахир номи «Миллий» ку, демак халқ пулига қурилган, лекин битгач, кимдир томонидан хусусийлаштириб олинган бўладими, шунда?

Буниси ҳам майли, пул тўлаб кирдик, лекин бизга ваъда берилган Фалончиев хонада хануз йўқ. Шогирд йигитча телефонда устози билан гаплашиб, бизга, рентген қилдирамиз, деди. Миллийдан чиқиб (!), ТошМИ ҳудудидаги бошқа бир бинога офтобда пиёда бордик. Йўл-йўлакай қанча рентгенлардан ўтдик, шогирдга, мана шунда рентген қилдирсакчи, десам у, булар сифатсиз қилади (!), деди. Устози айтган рентгенга бордик, 50 мингга рентген қилдирдик. Бу орада қаерлардадир «зарур ишлар билан юрган» устоз Миллий марказ биносига қайтиб келганмиш. Биз яна офтобда, лунжини дамбадам силаётган қизимнинг аҳволига ачинганча қайтдик.

Бошқа хоналарга навбат гавжум, биз яна йўлакнинг ҳооов охиридаги хона эшигига бордик. Ҳеч ким йўқ. Эшик ҳам қулф. Шогирд қўнғироқ қилди. Меҳрибон ҳамшира югуриб келиб эшикни очди, келинглар муздеккинада ўтира туринг, устоз хозир келади, деди. Биз хонага кириб, чамамда 10-15 дақиқа ўтирдик.

Ниҳоят, биз излаган гнотолог виқор билан кириб келди. У 35-40 ёшлардаги йигит экан. Беморни курсига ўтқазиб обдон текширди, қўлига берганимиз рентген суратини кўриб бўлгач, ташҳис қўйди: лимфа яллиғланиши. Давоси: хали милкни ёриб чиқмаган ақл тишини олиб ташлаш. Олинг, дедим. У, майли биз тайёрмиз, бу кичик бир операция бўлади, нархи мураккаблигига қараб, 800 мингдан 1 млн 600 минггача, деди. Лунжидан қўли тушмаётган қизимнинг аянчли аҳволини кўриб, майли, дедим.

Негадир устоз иккилана бошлади, аввал даволаниши керак, антибиотиклар олиши керак, деди. Икки кундан кейин сафарга командировкага кетишимни билгач, бир ҳафтадан кейин олиб келинг, ўшанда кўрамиз, унгача кунига икки маҳал (!) нимесил ичсин оғриқни қолдиради деди. Хозир эса қайтишингизда халиги рентгенга кириб, бошқатдан (!) снимка қилдиринг, буниси 2D экан, менга 3D керак. Дискка ёзиб берсин, «доплата» қиласиз, мени айтсангиз телеграмимга снимкани ташлаб беришади деди. Мен, нега нима фарқи бор, ахир хозиргина тушдик (одатда, одам 1 йилда 6 ой оралатиб рентгенга тушиши мумкин, ундан ортиғи соғлиққа зарар, деб биламан), десам устоз нима деди, денг эмишки жағ соҳасининг нерв толаси қаердан ўтганини аниқ билиши керак экан(!). Қизим тузалиши учун хозир ҳар нарсага розиман.

Қўлтиғидан тарвузи тушган одамдай ортга қайтдик. Йўл-йўлакай таниш стоматологга дуч келдик, опа нима гап, деб қолди у. Мен бор муаммони унга айтдим. У қизимни тишларини текшириб, рентген снимкасини кўриб, хозир бу тишни олиб ташламасак, эрталабгача лунжи шишиб кетади(!) деди. У зудлик билан бошқа тор мутахассисларни чақиртириб, қисқа консилиум ўтқазди.

Қарор қабул қилинди: «устоз» қўйган ташҳис нотўғри, лимфада яллиғланиш йўқ. Учта тиш олиниши керак. Айниқса, жағ соҳасида қийшиқ ўсиб, ёнидаги тишга ва жағ тўқимасига юк бўлаётган пастки тиш зудлик билан олиниши зарур, деган қарор қабул қилинди.

Эрталабдан бери Миллий марказ ва бошқа бинолар орасида сарсон югуравериб пешиндан ошганини билмабмиз. Шифокор тезда қизингизни енгил овқатлантириб келинг, муолажа ярим соат давом этади, муолажадан кейин яна 2 соат овқатланиши мумкинмас, қувват йиғсин, деди. Мана бу инсонийликмасми?!

Шифокор айтганидек, ярим соатда «ақл тиши» деб аталмиш аслида «нодон» тиш Эски ТошМИ болалар стоматологияси бўлимида олиб ташланди «Миллий»дагидек отангга бор, онангга бор, ушови ашинча, тушови машинча… каби гаплар йўқ. Қизимнинг жони азобдан қутилди. Агар «димоғидан қор ёғувчи устоз» нинг айтганини қилсак, яъни бир ҳафта кутсак, билмадим нималар бўларди.

Ҳа, айтганча, муолажа тугагунча мен ҳам бекор ўтирмай Гуглжондан сўрадим, ўша виқорли Фалончиев ким ўзи, деб. Гуглжон менга билмадим кимлигини, лекин у сен излаган «гнотолог» эмас, деб жавоб берди ва суратини кўрсатди. Ана сизга замонавий тиббий хизмат:(((

Менинг шахсий хулосам шуки, «Миллий марказ» номини «Пулли марказ» деб ўзгартиришсин.

Муҳайё Саидова