Испанияда велопойгада Исроил жамоасига қарши намойишлар
Испаниянинг La Vuelta велопойгасининг 5-босқичи вақтида фаоллар Исроил-Премьер Тек жамоаси спортчилари ҳаракатини тўсиб қўйишди.
Кеча Каталониянинг Фигуэрес шаҳри ҳудудида, пойганинг 24-километрида бир гуруҳ намойишчилар Фаластин байроқлари ва Исроилнинг Ғазодаги ҳаракатларига қарши шиорлар ёзилган баннерлар билан йўлни тўсиб, исроиллик велоспортчилар ҳаракатини вақтинча секинлаштирди.
La Vuelta бош директори Хавьер Гилленнинг таъкидлашича, тинч намойиш қонуний ҳисобланиши мумкин, аммо зўравонлик билан тўсқинлик қилиш қонунга зиддир. У спортчиларга яна шундай тўсиқ қўйилмаслиги учун чоралар кўрилишини билдирди.
Шу билан бирга, Испаниядаги бир қатор фаластинпарвар ташкилотлар “Исроил спортини бойкот қилиш платформаси” номли кампанияни бошлаб, Исроилнинг спорт мусобақаларида иштирокини чеклашга чақирмоқда. Улар ижтимоий тармоқларда ҳам Исроил жамоасининг La Vueltaда қатнашишига қарши намойишларга чорламоқда.
