Европа Иттифоқи ва Буюк Британия Россия элчиларини чақиртирди
Европа Иттифоқи ва Буюк Британия Киевга уюштирилган ҳужум туфайли Россия элчиларини чақиртирди, деб хабар бермоқда DW нашри.
Нашр манбаларига кўра, Буюк Британия ташқи ишлар вазирлиги Россия элчиси Андрей Кэлинга Киевга уюштирилган ҳужум муносабати билан чақирув юборди. Ҳужум оқибатида Киевдаги “Британия Кенгаши” (British Council) биноси зарар кўрган.
«Киевдаги фуқаролик объектларини нишонга олган, шу жумладан, British Council биносига зарар етказган Россиянинг бемаъни ва даҳшатли ҳужумларидан азият чекканларнинг барчаси билан ҳамдардмиз. Путин болаларни ва тинч аҳолини қурбон қилмоқда, тинчлик умидларини йўқ қилмоқда. Бу қон тўкилиши тўхташи керак», — дея таъкидлади ёзди Буюк Британия бош вазири Кир Стармер.
Бундан ташқари Европа дипломатияси раҳбари Кая Каллас ҳам Киевга уюштирилган ҳужумлар учун Россиянинг Евроиттифоқдаги элчиси Брюсселга чақиртирилганини маълум қилди.
«Россия ҳужуми оқибатида Европа Иттифоқининг Киевдаги ваколатхонаси биноси зарар кўргач, мен Украинадаги ЕИ вакиллари билан суҳбатлашдим. Украинани қўллаб-қувватлашдаги қатъийлигингиз бизга куч бағишлайди. Ҳеч бир дипломатик миссия ҳужум нишони бўлмаслиги керак», — деб ёзди Каллас Х ижтимоий тармоғида.
Эслатиб ўтамиз, 28 августга ўтар кечаси Россия Киевга ракеталар ва дронлар билан ҳужум уюштирган эди. Сўнгги маълумотларга кўра, мазкур зарбалар оқибатида камида 18 киши ҳалок бўлган.
