Истанбул 18–21 сентябрда Босфор Кубоги 2025 қайиқлар пойгасига мезбонлик қилади
Уч томондан ажойиб мовий денгизлар билан ўралган Туркия жаҳон миқёсидаги сув спорти тадбирлари билан дунёнинг турли бурчакларидан денгиз ихлосмандларини ўзига жалб қилмоқда. Босфор кубоги мамлакатнинг елканли спорт мусобақалари бўйича энг узоқ давом этган мусобақа ҳисобланади. Шунингдек, бу икки қитъа ўртасида ўтказиладиган дунёдаги кам сонли пойгалардан биридир.
Ушбу ҳаяжонли пойга қарийб чорак аср давомида Истанбулнинг юрагига яхтачилик руҳини олиб келди. Бу йил 18-21 сентябрь кунлари Истанбулда 24-марта бўлиб ўтадиган Босфор кубоги Туркиянинг елканли спорт мусобақаси сифатида ўз меросини давом эттиради.
Босфор учун “оловли жанг”
Тасаввур қилинг-а, ранг-баранг елканлар флоти бу бетакрор шаҳарнинг осмони узра кўтарилиб, уларнинг акси Босфорнинг ялтираб турган сувлари бўйлаб рақсга тушмоқда. Истанбулнинг жозибали Босфор бўғози ҳар йили бир ҳафта охирида ҳайратланарли томошалар ҳамроҳлигида шиддатли, аммо дўстона рақобат руҳида ўтадиган Босфор кубоги мусобақасининг саҳнасига айланади.
Одатда тижорат кемаларидан ташқари ҳаммага ёпиқ бўлган Босфор бўғозида пойга ўтказиш учун берилган махсус рухсат билан дунёнинг турли бурчакларидан келган 85 га яқин қайиқдаги денгизчилар ягона мақсад остида Истанбулда тўпланишади: қитъаларни ажратиб турувчи ва империяларнинг юксалиши ҳамда қулашига гувоҳ бўлган дунёдаги ягона табиий бўғозда ўз маҳоратларини синаб кўриш.
18-сентябрь куни очилиш куни ва эртаси куни илк қайиқ пойгалари Жаддебостан соҳилларида бўлиб ўтади. 20-сентябрь куни 10 та давлатдан 900 га яқин денгизчилар Босфор кубоги-2025нинг умумий ғолибини аниқлаш учун мураккаб кураш олиб борадиган энг муҳим сана ҳисобланади. Шаҳардаги учта осма кўприк ва соҳиллардаги қарийб бир миллион томошабиннинг диққатли нигоҳлари остида узунлиги 25 футдан 86 футгача (тахминан 7,7 метрдан 26,5 метргача) бўлган қайиқлар ғалаба учун шиддатли рақобатга киришади.
Шамоллар театри
Босфор кубоги нафақат мусобақанинг ҳаяжонга бойлиги, балки шаҳарни қамраб олган фестивал муҳити билан ҳақиқатдан ҳам унутилмас онлар бахш этади. Бу – Шарқ билан Ғарбнинг, тарих билан замонавий дунёнинг тўқнашадиган пойгасидир. Истанбулликлар йилда бир марта Босфорни безайдиган кўзни қамаштирувчи денгиз томошасига гувоҳ бўлиш учун шаҳар соҳилларига тўпланишади.
Бу йил бу ажойиб томоша Истанбул Тасвирий санъат академияси билан ҳамкорликда ташкил этилган ҳамда шаҳарнинг машҳур шамолларини жонлантирадиган “Шамоллар театри” бадиий спектакли билан кенгаяди.
Босфор бўғозидаги пойга соат 12:00 дан 17:00 гача ўтказилади ва қатнашчилар тушдан кейинги кун давомида Босфор соҳилларида ҳашаматли зиёфатдан баҳраманд бўладилар.
