Таиланд суди Бош вазирни ахлоқ қоидаларини бузганлиги учун лавозимидан четлатди
Таиланд Конституциявий суди жума куни Бош вазир Пхэтхонгтхан Чиннаватни ахлоқ қоидаларини бузганликда айбдор деб топиб, лавозимидан четлатди.
Бу ҳақда Thai PBS маҳаллий нашри хабар берди.
Жанжал 15 июнь куни Камбоджа парламенти спикери Хун Сен билан бўлган телефон суҳбати ёзуви эълон қилинганидан кейин бошланди, унда Чиннават Таиланд армияси қўмондонини танқид қилган.
Пхэтхонгтхан эълон қилинган телефон суҳбатида ўз позициясини ҳимоя қилди ва буни музокаралар олиб боришдаги тактика деб атади. Бироқ, суд ўз қарорида бу далилни, шунингдек, унинг Таиланд манфаатларини ҳимоя қилишга урингани ҳақидаги даъвосини рад этди.
Хабарга кўра, Чиннават Камбоджа парламенти спикери Хун Сен билан телефон мулоқоти мамлакат муаммоларини ҳал қилиш ва зўравонликсиз тинчликни тиклашга қаратилган шахсий музокара эканлигини таъкидлаган.
“Чиннаватнинг хатти-ҳаракатлари миллат ғурурини ҳимоя қилмади ва шахсий манфаатларни мамлакат манфаатларидан устун қўйди, бу ахлоқий меъёрларни жиддий бузиш ёки унга риоя қилмаслик ҳисобланади”, дейилади судда.
Суд, шунингдек, унинг хатти-ҳаракатлари аҳолининг Бош вазирга бўлган ишончи йўқолишига олиб келганини қўшимча қилди, деб хабар берди report.az.
