Божхоначилар 400 млн сўмлик тарихий бойликларни музейга топширди
Тошкентда қимматбахо тарихий ашёларни ноқонуний олиб чиқишга уринган ҳолат аниқланди ва улар давлат музейига топширилди.
Қўмита маълумотига кўра, «Келес» темир йўл чегара постида «Тошкент–Новосибирск» йўловчи поезди йўналиши бўйича чиқиб кетаётган фуқаронинг қўл юки ва сумкалари текширувдан ўтказилганда 325 дона ноёб ашё топилди. Улар орасида қадимий тангалар, заргарлик буюмлари, артефактлар, гиря ва камон ўқи учлари борлиги аниқланган.
Текширувдаги 210 дона тангалар Ўзбекистон давлатчилиги тарихи давомида мавжуд бўлган деярли барча сулолалар ва давлатларга тааллуқли нусхалар экани маълум қилинди. Маданий мерос агентлиги экспертизасига кўра, топилмалар милоддан аввалги II асрдан то XX асргача бўлган даврни қамраб олади.
Мазкур ашёлар тарихий ва маданий аҳамиятга эга деб баҳоланиб, уларнинг қиймати салкам 400 млн сўм этиб белгиланди. Амалдаги қоидаларга мувофиқ, ушбу топилмалар давлат музейларига беғараз топширилиши лозим.
Шу асосда, 325 дона қадимий ашё Ўзбекистон Ислом цивилизацияси маркази музейи фондига вақтинча сақловга қабул қилинди. Мутасаддиларга кўра, бундай ҳолатлар маданий меросни муҳофаза қилиш ва қонуний тартибда сақлашнинг муҳимлигини яна бир бор намоён этмоқда.
