Германия Украинага ҳарбий юбориш масаласини кун тартибидан чиқарди

Германия ҳукумати Украинага Бундесвер қўшинларини юбориш эҳтимоли ҳақидаги масалани кун тартибидан олиб ташлади.

Бу ҳақда Bild нашри ҳукуматдаги манбаларига таяна туриб хабар берди.

Манбаларнинг айтишича, немис қўшинларини оташкесим режимини назорат қилиш учун юбориш масаласи номаълум муддатгача музлатилган. Кейинги муҳокамалар фақат АҚШ президенти Дональд Трамп қандайдир чора кўрса ёки Россия–Украина можароси ҳақиқатан барҳам топган тақдирдагина мумкин бўлиши айтилмоқда.

Шу билан бирга, ҳозирча бунинг аломатлари кўринмаётгани, шу боис масала ёпилгани қайд этилган.

Bild маълумотига кўра, канцлер Фридрих Мерц ва унинг ўринбосари Ларс Клингбайл Россия президенти Владимир Путин ҳамда Украина раҳбари Владимир Зеленскийнинг яқин орадаги учрашувига эндиликда ишонмаяпти. Шу сабабдан, Ғарб қўшинларини Украинага хавфсизлик кафолатларининг бир қисми сифатида жойлаштириш масаласи фақат узоқ келажакдаги истиқбол сифатида кўрилмоқда.

Эслатиб ўтамиз, илгари Мерц Бундесвер қўшинларини Украинага юбориш имкониятини истисно этмаган ва бу масалани ҳукмрон коалиция ичида муҳокама қилишга ваъда берган эди.