Европа Иттифоқи Россияга қарши 19-санкция пакети устидан ишни тезлаштирди

Европа Иттифоқи (ЕИ) аъзолари — Венгриядан ташқари — Россиянинг Украина шаҳарларига қаратилган сўнгги ҳужумларини қоралаб, 19-санкция пакети устидан иш жараёнини тезлаштиришини маълум қилди.

ЕИга аъзо 26 давлатнинг қўшма баёнотида Украина халқи билан ҳамдардлик билдирилиб, Россия ҳужумлари кескин қораланди. Шунингдек, Киевдаги ЕИ ваколатхонасига етган зарар дипломатик хавфсизликка таҳдид сифатида баҳоланди.

Иттифоқ баёнотида тинч аҳоли ва фуқаролик объектларига ҳужум қилиш уруш жинояти эканлиги таъкидланди. Украина эса 2025 йил мартидан бери бир неча бор шартсиз ўт очишни тўхтатишга тайёрлигини билдиргани қайд этилди.

ЕИ Брюссельда АҚШ ва халқаро ҳамкорлар билан бирга Украина учун адолатли ва барқарор тинчликни таъминлаш йўлида иш олиб боришини билдирди.