Паулу Бенту Тошкентда музокара ўтказиб, таклифни рад этдими?
Ўзбекистон миллий жамоасини бошқариши мумкинлиги ҳақида хабарлар тарқалган португалиялик мутахассис Паулу Бенту масала бўйича якуний қарорини билдиргани ҳақида A Bola маълумот тарқатди. Манбанинг ёзишича, жамоа раҳбарияти ва 56 ёшли мураббий ўртасидаги музокаралар Тошкент шаҳрида амалга оширилган. Бироқ кейинчалик Бенту ортига қайтиб, таклифни қабул қилмасликка қарор қилган.
Аввалроқ шундай йўналишдаги таклиф Германия футболининг тажрибали мутахассиси Йоаҳим Лёвга ҳам таклиф этилганди. Бироқ у ҳам бу ишни қабул қилмасликни маъқул кўрган эди.
Эслатиб ўтамиз, Паулу Бентунинг энг сўнгги иш жойи БАА миллий терма жамоаси ҳисобланади. У ерда ҳам у катта ишонч билан фаолият бошлаган бўлса-да, 26 март куни вазифасидан озод этилганди. Шундан бери мутахассис ҳеч бир клуб ёки жамоа билан шартнома имзоламаган ҳолда ишсиз юрибди.
Шу тариқа, Ўзбекистон миллий жамоасини қайси мутахассис бошқариши борасидаги интрига ҳозирча очиқ қолмоқда. Мухлислар эса яқин вақтда бунга ойдинлик киритилишини кутмоқда.
