Андижонда чақалоқлар кийими сифатсиз эканлиги аниқланди
Андижон шаҳрида жойлашган “SMT” МЧЖга қарашли “MTTY” савдо дўконида Туркияда ишлаб чиқарилган янги туғилган чақалоқлар кийими маҳсулотига назорат хариди ўтказилди.
Танлаб олинган маҳсулот аккредитациядан ўтган синов лабораториясига топширилиб, таҳлиллар жараёнида техник регламент талабларига кўра қуйидаги номувофиқликлар аниқланди:
• мато таркиби: асосий мато 100% пахта, декоратив мато 100% полиэфир тола;
• тикиш ишлари: ўралган бириктирувчи тикишлар буюмнинг олд томонида бажарилмаган;
• декоратив элементлар: синтетик толадан тайёрланган бўлиб, боланинг бўйин ва қўл терисига бевосита тегиб туради;
• эркин формальдегид миқдори белгиланган 20 мкг/г ўрнига 22,6 мкг/г бўлгани аниқланди.
Мазкур маҳсулотлардан фойдаланиш болаларда аллергик касалликлар ва тери яллиғланишига олиб келиши мумкин.
Ушбу номувофиқ маҳсулотларни реализация қилган “SMT” МЧЖга нисбатан чоралар кўрилиши ва савдо нуқталаридан чиқарилиши бўйича мурожаатлар юборилди ҳамда масала назоратга олинди.
