Буюк Британияда олти оёқли мушук туғилди
Буюк Британияда Моно номли мушук дунёга келиб, ўзининг ноодатий тузилиши билан ҳайрат уйғотди — у олти оёққа эга. Ветеринарлар бу ҳолат жуда кам учрайдиган эмбрион ривожланишидаги ўзгаришлар билан боғлиқ эканини маълум қилди, дея ёзади Daily Mail.
Мутахассисларнинг тушунтиришича, бундай жараён “ҳомила сўрилиши” деб аталади. Яъни, эгизаклардан бири ривожланишни тўхтатиб, иккинчисининг танасига қисман қўшилиб қолади. Мононинг қорнида иккита қўшимча оёқ шу тарзда пайдо бўлган.
Норвич шаҳридаги клиникада мушукни кузатаётган ветеринар шифокорларнинг сўзларига кўра, ортиқча оёқлар ички аъзолар билан боғланмаган, шунчаки терига ёпишган. Шу сабабли улар ҳайвоннинг соғлиғига хавф туғдирмайди ва зарурат бўлса, келажакда жарроҳлик йўли билан олиб ташланиши мумкин.
Ҳозирча Моно ўзини яхши ҳис қилмоқда, одатдагидек овқатланмоқда ва муаммосиз ҳаракатланмоқда. Унинг эгаси эса мушукка халақит бермас экан, оёқларини олиб ташлашни режалаштирмаётганини айтиб: “У аллақачон маҳаллий юлдузга айланган. Биз уни қандай бўлса, шундай яхши кўрамиз”, — деди.
