Германияликларнинг 63% Ғaзo уруши туфайли санкцияларга рози
Германия фуқароларининг кўпчилиги Европа Иттифоқининг Исроилга нисбатан санкциялар жорий этишини қўллаб-қувватламоқда — бу Германия ҳукуматининг расмий позициясига зид. Бу ҳақда Der Spiegel журнали эълон қилган сўров натижаларида маълум қилинди.
Сўров натижаларига кўра, респондентларнинг 63% қисми Ғазодаги уруш туфайли Исроилга нисбатан санкциялар киритишни қўллаб-қувватлаган. Фақат 29% респондент бундай чораларга қарши эканини билдирган.
Айниқса, «Яшиллар» партиясининг электорати орасида санкцияларни қўллаб-қувватлаш даражаси жуда юқори — 94%.
Ҳокимиятдаги Христиан-демократик иттифоқ (ХДС) ва Социал-демократик партия (СДПГ) сайловчилари орасида ҳам 68% респондент санкцияларга қарши эмаслигини билдирган.
Сўлчи партияларнинг сайловчилари орасида бу кўрсаткич 67% ни ташкил қилган.
Фақат Германия учун альтернатива (AfD) — ультраўнг партияси сайловчилари орасида фикрлар деярли тенг бўлган: 49% — «за», 51% — «қарши».
Шу билан бирга, Германия ҳукумати Европа Комиссиясининг Исроилни Horizon Europe илмий дастуридан қисман чиқариш бўйича таклифини рад этди.
Германия Ташқи ишлар вазири Йоханн Вадефуль таъкидлашича, бундай чоралар Исроил қарорларига таъсир қилмайди ва Ғазодаги урушни тўхтатишга ёрдам бермайди. У, бундан кўра, Қуддусга қурол етказиб беришни чеклаш муҳимроқ эканини айтди.
Ҳукумат позицияси билан жамоатчилик кайфияти ўртасидаги фарқ бора-бора аёнлашмоқда — айниқса уруш танқиди ортиб бораётган ва Германия ҳукуматидан Исроилга нисбатан қаттиқроқ позиция талаб қилаётган бир пайтда.
