Европа Исроил вазирларини қабул қилмаяпти
Нидерландия ҳукумати Исроилнинг ўта ўнг қарашли икки вазири — Итамар Бен-Гвир ва Бецалел Смотрични “исталмаган шахс” деб эълон қилди ва уларга Европа Иттифоқи ҳудудига киришни тақиқлади. Бу ҳақда Исроилнинг давлат телеканали хабар берди.
Нидерландия ташқи ишлар вазирининг айтишича, бу қарор ушбу икки вазирнинг фаластинликларга нисбатан зўравонликка чақирувлари, ноқонуний яҳудий аҳоли пунктларини кенгайтиришга даъватлари ҳамда Ғазо ҳудудида этник тозалашни тарғиб қилгани сабабли қабул қилинган.
Бу чеклов Словения ва Испания давлатларининг ўхшаш қарорларидан кейин амалга оширилди. Улар ҳам Исроилга нисбатан санкциялар жорий этиб, ушбу икки вазирга ўз мамлакатларига киришни ман этган.
Шунингдек, 2024 йил июн ойида Буюк Британия, Норвегия, Австралия, Янги Зеландия ва Канада ҳам Итамар Бен-Гвир ва Бецалел Смотричга қарши санкциялар эълон қилган эди. Улар ушбу шахсларни фаластинликларга қарши зўравонликни қўллаб-қувватлаганликда айблаган.
Ўтган ҳафта Бельгия ҳам Исроилга қарши “қаттиқ санкциялар” киритилишини маълум қилди. Жумладан, ушбу икки вазир ва бир нечта тажовузкор яҳудий аҳоли пунктлари вакилларини “исталмаган шахс” деб эълон қилишини билдирган.
