Самарқандда қариндошининг мурдасини қопда олиб кетаётган эркак ушланди
Самарқанд шаҳрида эркак одам жасадини қопга солиб, аравада олиб кетаётган пайтда қўлга тушди. Бу ҳақда Mahalla телеканали эфирида хабар берилди.
Қайд қилинишича, 24 август куни Самарқанднинг «Навбоғчиён» ва «Бўстон» маҳаллалари раислари ҳудудни айланиб чиқиш жараёнида икки шахснинг шубҳали ҳаракатларини пайқаган. Таъкидланишича, улар болалар аравачаси билан қабристонга кетаётган эркак ва аёлни кўриб қолган. Аравачадаги елим идишлар орасида қоп яширилган бўлиб, унинг ичида жасад борлиги аниқланган.
Маҳалла раислари ички ишлар органларига зудлик билан хабар берган. Текширув давомида аниқланишича, фуқаро ўз поччасини ўлдириб, жасадни қабристонга яширишга уринган.
Маҳалла раисининг айтишича, эркак ушбу жасад поччасига тегишли эканини, уйига келганида ўлиб қолганини, шунинг учун кўммоқчи эканини маълум қилган.
Таъкидланишича, ички ишлар органлари ходимлари воқеа жойига етиб бориб, жиноятни фош қилган. Жиноятнинг сабаблари ва гумондорларга қандай жазо берилгани ҳақида хабарда маълумот келтирилмади.
Ички ишлар вазирлиги маҳалла раислари Адҳам Раҳимов ва Аъзам Остонқуловнинг «ҳушёрлиги ҳамда тезкор хабар бергани» учун кўкрак нишони билан тақдирлаган.
