Хитойсиз Путин Россияси ҳеч нарса эмас — Зеленский
Украина президенти бу фикрни Нью-Йоркда бўлиб ўтган БМТ Хавфсизлик Кенгаши йиғилишида сўзлаган нутқида билдирди.
Унинг таъкидлашича, Россия президенти Владимир Путин Украина билан урушни тўхтатиш ҳақида бевосита музокаралар ўтказишдан қўрқади.
«Путин Украина ва бутун дунё билан юзма-юз ўтириб, фақат урушни исташини очиқ тан олишдан қўрқади. У бунинг ўрнига қон тўкилишини тўхтатишни истамайдиган ва истай олмайдиган делегатларни юборади. Путин хорижга, масалан, Пекинга ёки бошқа жойларга борганда ҳам, бундан фақат одамларни ўлдириш учун вақтдан ютиш ва дипломатияга интилиш каби кўринадиган кўзбўямачиликни яратиш учун ҳаракат қилади», — деди Украина президенти.
Зеленский, шунингдек, ўз нутқида Хитойга мурожаат қилди ва ҳозирда Россия унга боғлиқ эканини таъкидлади
«Агар Хитой чиндан ҳам бу урушни тўхтатмоқчи бўлса, Москвани босқинни тўхтатишга мажбур қилган бўларди. Хитойсиз Путин Россияси ҳеч нарса эмас. Аммо Хитой кўпинча жим туради ва тинчлик йўлида фаол ҳаракат қилиш ўрнига четда кузатувчи бўлиб қолмоқда», — деди Украина етакчиси.
Бундан ташқари, у Доналд Трамп билан учрашуви ажойиб ўтганини маълум қилди. Зеленскийнинг сўзларига кўра, улар тинчликка эришиш бўйича “бир нечта яхши ғоялар”ни муҳокама қилишган ва у бу ғоялар самара беради, деган умидда.
«Биз Қўшма Штатларнинг ҳаракатлари Россияни тинчликка мажбурлашига умид қиламиз. Москва АҚШдан қўрқади ва ҳар доим унга эътибор қаратган», — деди Украина президенти.
