«Мен Трампнинг чақириғини қўллаб-қувватлайман»
NATO бош котиби алянс давлатлари ҳаво ҳудудига кирган Россия самолётларини уриб тушириш тарафдори эканини билдирди.
«Мен Трампнинг NATO ҳаво ҳудудини бузган Россия самолётларини уриб тушириш чақириғини қўллаб-қувватлайман», — деди Марк Рютте Fox News телеканали эфирида.
АҚШ президенти Доналд Трамп Украина етакчиси Владимир Зеленский билан ўтказилган матбуот анжуманида NATO давлатлари ўз ҳаво ҳудудига кирган Россия самолётларини уриб тушириши мумкинлигини айтган эди. Бироқ, Трамп «Агар Европа давлатлари Россия самолётини уриб туширса, АҚШ уларни қўллаб-қувватлайдими?», деган саволга аниқ жавоб бермай, «Бу вазиятга боғлиқ» деган эди.
