Сурхондарёда Damas ҳайдовчиси 3 кишини уриб юборди
Бунга рул бошқарувидаги техник носозлик сабаб бўлган.
Ижтимоий тармоқда Сурхондарё вилоятининг Шўрчи туманида Damas автомашинаси бир нечта фуқароларни уриб юборгани акс этган видео тарқалганди. Ҳолат юзасидан вилоят ИИБ ЙҲХБ расмий муносабат билдирди.
Қайд этилишича, ҳодиса 22 сентябрь куни соат 14:00 ларда Шўрчи тумани “Наврўз” маҳалласи ҳудудидан ўтувчи йўлда юз берган. 1998 йилда туғилган ҳайдовчи Damas автомашинасида ҳаракат вақтида рул бошқарув қурилмасида носозлик юзага келиб, қарама-қарши бўлакка чиқиб кетиб, йўлнинг тартибга солинмаган пиёдалар ўтиш жойидан кесиб ўтаётган 3 нафар пиёдани туртиб юборган. Натижада пиёдалар олган тан жароҳатлари сабабли туман тиббиёт бирлашмасига етказилган.
Ҳозирда ҳолат юзасидан Шўрчи тумани ИИБ томонидан йўл-транспорт ҳодисаси оқибатида олган тан жароҳатининг оғирлик даражасини ҳамда транспорт воситасининг техник ҳолатини аниқлаш мақсадида судга оид тиббий ва техник экспертиза тайинланиб, терговга қадар суриштирув ҳаракатлари олиб борилмоқда.
