Янги Damas ва Cobalt — икки моделга катта янгилик киритилди

Янги Damas ва Cobalt — икки моделга катта янгилик киритилди

UzAuto Motors компанияси ўзининг энг талабгир икки автомобили — Chevrolet Damas ва Cobalt моделлари ҳақида янгиликлар билан бўлишди. Янги лойиҳалар ишлаб чиқариш жараёнидаги муҳим босқич сифатида эътироф этилмоқда.

 

Damas — янги кўриниш, катта имконият

 

Маълум қилинишича, компания яратилаётган ишлаб чиқариш қувватларида Damas минивенининг янги авлодини ишлаб чиқаришни йўлга қўймоқда. Янги модел аввалгисидан кўра анча катта ўлчамга, юқори юк кўтариш қобилиятига ва кенг салонга эга бўлади.

Шу билан бирга, ҳайдовчи ва йўловчилар учун қулайлик даражаси ҳам сезиларли равишда оширилгани қайд этилган. Янги версиянинг йўловчи турига Damas Move номи берилган бўлса, юк-йўловчи тури Damas Max деб аталади.

Энг қизиғи, янги ва эски моделлар бир вақтнинг ўзида ишлаб чиқарилади — харидорлар ўз эҳтиёжи ва имкониятига кўра танлов қилиш имкониятига эга бўлади.

 

Cobalt — замонавий қулайлик ва янги технологиялар билан

 

Шу билан бирга, Chevrolet Cobalt автомобили ҳам икки янги версия билан бойитилди: Cobalt Style MCM ва Cobalt Midnight MCM. Ушбу моделларда нафақат ташқи жиҳатдан, балки техник жиҳатдан ҳам жиддий янгиланишлар амалга оширилган.

Маълумотга кўра, янги Cobalt двигатели қайта ишланган, ABS тизими такомиллаштирилган, хавфсизлик блоклари ва диагностика модули янгиланган. Шунингдек, мультимедиа тизими Android Auto ва Apple CarPlay платформаларини қўллаб-қувватлайди.

Автомобил энди круиз-контрол функциясига, иситиладиган олд ўриндиқларга, эко-чармдан тайёрланган салонга ва янгиланган асбоблар панелига эга бўлади. Рул ҳам энди мультимедиа ва круиз-контрол бошқарув тугмалари билан жиҳозланган.

Расмий маълумотга кўра, Cobalt’да жами 50 дан ортиқ асосий қисмлар янгиланган. Кейинги босқичда эса моделнинг ташқи кўриниши — фейслифт версияси ҳам ишлаб чиқилаётгани айтилди.

Янги модификациялар мавжуд комплектациялар билан бир қаторда ишлаб чиқарилади. Демак, мижозлар энди жиҳозланиш даражаси ва функцияларига кўра фарқланувчи Cobalt’нинг тўрт хил вариантини танлаш имконига эга бўлади.

Автомобилларнинг нархлари ва сотув бошланиш санаси ҳақидаги маълумотлар кейинроқ эълон қилинади. Шу тариқа, UzAuto Motors ўзининг машҳур моделларини янада замонавий, қулай ва техник жиҳатдан такомиллашган ҳолда тақдим этишни бошлади.

Дўстларингизга ҳам юборинг: